Application for Admission

How to Apply

Click here to get started on your journey to lifelong learning.

programs

Our Programs

We have three undergraduate and 27 graduate programs to choose from.

odel

Why UPOU

Learn about the mode of learning and what makes UPOU different.

UPOU nagdaos ng talakayan tungkol sa pagbabago sa Filipino sa panahon ng digital.

Naki-isa ang UP Open University sa pagdiriwang ng Buwan ng Wika ngayong Agosto 2015. Sa pangunguna ng UPOU Cultural Committee, ang "WikiWika: Filipino sa Panahong Digital," ay naganap noong ika-24 ng Agosto sa CCDL Auditorium, UPOU Headquarters, Los Baños, Laguna.

Ang WikiWika ay isang panayam na partikular na nakatuon sa kahalagahan at kalagayan ng paggamit ng wikang Filipino sa panahong digital – sa panahon ng malawak na panghihimasok at paglawak ng gampanin ng teknolohiya, lalo na ng social media at internet, sa buhay ng tao.

Pangunahing mga kalahok sa talakayan ay mga guro sa mga pampubliko at pribadong eskwelahan sa Los Baños, Bay, Calauan at Calamba, na ang itinuturo ay Filipino, Araling Panlipunan, Sibika at Kultura at HEKASI.

Si Dr. Primo Garcia, Chair ng UPOU Cultural Committee, ang naghatid ng pambungad na pananalita pagkatapos awitin ng UPOU Chorale ang pambansang awit. Inilahad ni Dr. Garcia ang layunin ng panayam at binaggit na "Bilang cyber campus ng UPOU, naging misyon ng UPOU ang magbigay ng espasyo para sa pag-aaral ng mga pagbabago sa lipunan dulot ng mga pagbabago sa mga teknolohiyang pang impormasyon at komunikasyon."

Isang audio-visual presentation na pinamagatang "Mga Mumunting Impormasyon Tungkol sa Pilipino, Filipino, at ang Internet" ang nagbigay ng bahagyang kaalaman sa mga guro tungkol sa kasalukuyang katayuan ng wikang Filipino at ng mga Pilipino online. Pagkatapos ng maiksing palabas, inimbitahan na ang mga tagapag-salita sa entablado.

Si Dr. Ramon Guillermo ang unang tagapagsalita. Siya ay isang Propesor sa Departamento ng Filipino at Panitikan ng Pilipinas sa Kolehiyo ng Arte at Literatura ng UP Diliman. Ang lektyur nya ay pinamagatang "Si Balagtas at ang Wikang Filipino sa Panahon ng Digital na Humanidades." Ipinakita nya ang mga pagbabago sa wikang ginamit sa "Florante at Laura" ni Fransisco Balagtas, at nagbahagi sya ng ilang mga aplikasyon at instrumento na maaaring makatulong sa mga guro sa pagtuturo nila ng Filipino at Panitikan.

Ang pangalawang tagapagsalita ay si Dr. Rommel Rodriguez, Direktor ng Sentro ng Wikang Filipino sa UP Diliman. Ang presentasyon niya ay tungkol sa iba’t ibang hamon at opurtunidad na dala ng panahong digital sa wikang Filipino. Ayon kay Dr. Rodriguez, ilan sa mga ito ay ang paglikha ng mga digital textbook, pag-aaral ng mga lokal at dayuhang wika, preserbasyon ng mga wika sa Pilipinas, paglikha ng mga lokal na kaalamang bayan, kolaborasyon sa pagitan ng mga akademikong sektor at mga insitusyon ng estado, at pagsasanib pwersa ng iba’t ibang disiplina kung saan ang wika ang magsisilbing tagapagtagni.

Nagkaroon ng pagkakataon na magtanong at magbahagi ng mga karanasan ang mga guro. Marami silang natutunan at nais pa nilang makibahagi muli sa mga talakayan na tulad nito lalo na kung ang pag-uusapan ay tungkol sa mga paraaan kung paano nila maituturo ang kanilang paksa ng mas epektibo at mahikayat ang mga estudyante na maging mahusay at makasanayan ang pagsasalita sa wikang Filipino.

Natapos ang seminar sa pangwakas na pananalita ni Dr. Jean Saludadez, Vice-Chancellor for Finance and Administration ng UPOU. Nagpasalamat sya sa lahat ng dumalo at hinikayat ang lahat na huwag maging dayuhan sa sariling wika. (Anna Cañas-Llamas)

21st Century Education in an Open World